Rev 3 | MEU | STEP | Ekalesia oreana Sadi ai ena aneru ini ba tore henia toma: Dirava ena lauma hituosi bona hisiu hituosi e abimu tauna ena hereva bini. Emu kara na dibagu, e herevalaimumu o maurimu e tomamu, to vada o mase.

Revelation of John 3

Hereva

Sadi ekalesia oreana ena

1 Ekalesia oreana Sadi ai ena aneru ini ba tore henia toma: Dirava ena lauma hituosi bona hisiu hituosi e abimu tauna ena hereva bini. Emu kara na dibagu, e herevalaimumu o maurimu e tomamu, to vada o mase. 2 Ba noga. Mia ḡaudia, be masemu ḡaudia, ba reḡu namonamo; badina be emu kara maoromaorona ta Dirava vairanai asina davaria. 3 O abi dae bona o kamonai ḡaudia na ba lalo tao bona ba badina; ba helalo kerehai danu. Bema basio gima, lau na henao tauna na heto baina vasi; egu vasi horana na basio diba. 4 A eneseni ai, Sadi ai, ta ta ese edia dabua asie hamiro; idia na dabua kurokurodia bae hadokilai, lau ida baia raka hebou, badina be idia na nanamo. 5 Kwalimu tauna ese dabua kurokurona baine hadokilaia; ia ladana danu mauri bukana amo basina rohoa, a Tamagu vairanai bona ena aneru vairadiai ia ladana baina gwauraia. 6 Mai taiana tauna ese Lauma ena hereva ekalesia oreadia ediai baine kamonai.

Hereva

Filadelfia ekalesia oreana ena

7 Ekalesia oreana Filadelfia ai ena aneru ini ba tore henia toma: Helaḡa bona hereva momokani tauna, David ena ki e abiamu tauna, e kehoamu bena ta basine koua, e kouamu bena ta basine kehoa, tauna ena hereva bini. 8 Emu kara na dibagu. A itaia, iduara ta vairamu ai vada na kehoa, tau ta basine koua diba. Dibagu danu emu goada na dia bada, to egu hereva vada o badinaia bona ladagu so ḡorea. 9 A itaia, sibodia Iuda taudia ai e hahelaomu, unu na e koikoimu, idia na Satana ena orea taudia, dia Iuda taudia; baina tuidia, oi aemu badinai bae goru diho, bae diba lau ese na lalokau henimumu. 10 Egu haheauka herevana vada o badinaia dainai, tanobada idoinai baina dibaia bona tanobada taudia baina dibadia negana ai na oi baina hamaurimu. 11 Lau na ba vasimu, vada o abia ḡauna ba dogoa tao tarika-tarika, bena tau ta ese havava ḡauna na kwaramu amo basine dadia. 12 Kwalimu tauna na egu Dirava ena dubu duna ai baina halaoa, unu amo ia na basine raka lasi lou. Bona egu Dirava ladana na ienai baina torea; egu Dirava ena hanua ladana danu, Ierusalem matamatana guba amo, egu Dirava ena amo, e dihomu, ienai baina torea; bona lau ladagu matamatana ienai baina torea. 13 Mai taiana tauna ese Lauma ena hereva ekalesia oreadia ediai baine kamonai.

Hereva

Laodikea ekalesia oreana ena

14 Ekalesia oreana Laodikea ai ena aneru ini ba tore henia toma: Hereva momokani tauna, dibana tauna mai maoromaorona bona mai momokanina ida, Dirava ese e kara ḡaudia roboana, ena hereva bini. 15 Emu kara na dibagu; oi na dia keru, dia siahu. Bona keru eiava boma siahu bema namo. 16 Taunabunai, oi na maivalo dainai, dia siahu bona dia keru, lau na udugu amo baina lorimu lasi. 17 Badina be oi na o tomamu “Lau na taḡa taugu, mai egu kohu momo; ḡau ta ai asina dabumu”. Madi, asi dibamu oi na dika rohoroho, ihareha, ogoḡami, mata-kepulu, asi ramimu. 18 Lau ese na haduamumu, egu ai gold ba hoia, lahi ese vada e haḡoevaia ḡauna; bena taḡa taumu ai baola. Dabua kurokurona danu ba hoia, ba dokilaia; bena hasio hemarai asi ramimu dainai. Mata muramurana danu ba hoia, matamu ba dahulai; bena ḡau ba ita. 19 Na ura henidiamu taudia na sisiba henidiamu bona na dadabadiamu; taunabunai, lalomu ba hasiahua, ba helalo kerehai. 20 A itaia, lau na iduara badinai na ginimu, na pidipidimu; eregu baine kamonai bona iduara baine kehoa tauna enai baina raka vareai, ia ida baia aniani hebou. 21 Kwalimu tauna na baina abia dae, lau ida egu terono ai baia helai hebou; lau heḡereḡeregu, na kwalimu, bena Tamagu ida ena terono ai a helai hebou. 22 Mai taiana tauna ese Lauma ena hereva ekalesia oreadia ediai baine kamonai.